MAG EK ONS VADER IN DIE HEMEL ‘PAPPA’ NOEM?

MAG EK ONS VADER IN DIE HEMEL ‘PAPPA’ NOEM?

Laat U Naam geheilig word

Sakkie Parsons

Iemand skryf aan my: “… is dit nie ʼn bietjie gewaagd om ons Vader aan te spreek as “Daddy” nie? Dit klink glad nie vir my reg nie.”

Laat ek eers verduidelik waar ek dink, aanspreekvorms vir ons Here soos byvoorbeeld, “Daddy” en Pappa en Pappie, hul oorsprong gekry het. Ons lees byvoorbeeld in Romeine 8:15

ROM 8:15  “Die Gees wat julle ontvang het, is nie ‘n Gees wat weer van julle vreesbevange slawe maak nie. Julle het die Gees van ware kind wees ontvang en deur hierdie Gees roep julle uit tot God: Abba – ons Vader.”

Die Woord “Abba” wat in hierdie gedeelte gebruik word, is ‘n Aramese woord en dit is, en ek probeer woorde gebruik wat, na die beste van my vermoë, die gevoel in hierdie woord oor te dra.

Dit is ‘n baie, baie innig, intieme, vol liefde wyse van iemand aanspreek.

Die woord het so ‘n innig, intieme betekenis, dat vertalers van die vroegste tye af, eerder as om die woord te probeer vertaal, liewer die woord net so gehou en in Afrikaans byvoorbeeld die woord “Vader” net daarna neergeskryf het.

Daar is nog twee gedeeltes waar die woord “Abba” voorkom, en ek kwoteer die gedeeltes:

MRK 14:36  “Abba” – dit beteken Vader – het Hy gebid, “vir U is alles moontlik.  Neem tog hierdie beker van lyding van My weg.  Maar doen nogtans nie wat Ek wil nie, maar wat U wil.”

Asook:

GAL 4:6  “En omdat julle Sy kinders is, het God die Gees van Sy Seun gestuur om in ons te lewe. Die Gees in ons roep voortdurend na God: “Abba!” – wat die Aramese woord is vir “Vader.”

So, indien jy werklik so ‘n intieme verhouding met ons Here het, kan jy na my mening verseker met ons Here praat as “Daddy” of  Pappa en Pappie.

Ongelukkig het satan, soos sy natuur nou maar is, dit reggekry dat die mens ook hierdie wonderlike, intieme wyse van ons Here aanspreek, in baie gevalle, om dit lig uit te druk, goedkoop en erger gemaak het.

Wat ek bedoel is dit: Ek het dit al gevind dat mense van ons Here as “Daddy” en Pappa praat om as’t ware te spog met hoe “goed” hulle verhouding met ons Here is.

In sommige gevalle met die aansporing van satan natuurlik word die intieme aanspreekvorm, wat Jesus ook gebruik het, vandag soms nie net afgewater om te spog oor hoe my verhouding met ons Here is  nie maar deur ander verder afgegradeer omdat dit hulle eintlik nie ‘n bloue duit skeel wat hulle sê nie, tot – en ek noem sommige van hierdie vir my walglike aanspreekvorm van ons Here, met die grootste afsku in my hart –

Die oubaas, grootbaas, ou kêrel, ou toppie ens., daar bo.

Of ek ons Here so noem om te spog met hoe goed my verhouding met ons Here is, en of ek sommer nie omgee wat ek ons Here noem nie, en of ek dit sommer uit arrogansie of wat jy dit ook al wil noem, ons Here noem wat ek Hom noem, dit is om ons Here se Heiligheid aan te tas. Anders gestel, vir my is dit om ons Here en Sy Naam te laster.

Laat ons maar baie versigtig wees hoe, en met watter gesindheid ons ons Here aanspreek.  Want sê ons Here:

EXO 20:7  “Moenie die Naam van die HERE jou God sonder rede gebruik nie.  Die HERE sal die een wat Sy Naam sonder die nodige respek gebruik, nie net so sonder straf laat wegkom nie.”

Vir my sê hierdie gedeelte:

Al sou ek ons Here om verskoning vra omdat ek Hom deur my manier van aanspreek of misbruik van Sy Naam Hom gelaster het, daar noodwendig gevolge vir my gaan wees en Hy het dit vir my vooruit gesê en soos ek ons Here geleer ken het, as Hy sê dat jy, soos in hierdie geval, nie ongestraf gaan wegkom nie, wel, dan kan jy maar weet jy gaan nie sonder gevolge vir jou laster vry wegkom nie:

EXO 20:7  “… Die HERE sal die een wat sy Naam sonder die nodige respek gebruik, nie net so sonder straf laat wegkom nie.

So, hoe ek ons Here ook wil aanspreek, ek moet onthou dat ek met God Almagtig praat en Hy kan in my hart sien wat my bedoeling en gevoel in my aanspreekvorm is, as ek Hom aanspreek as Pappa, Pappie, Daddy ens.

Ek sluit af met Jesus se woorde wat ook sommer aan my sê dat EXO 20:7 nie net deur die Jood nie, maar ook deur die Christen, in gedagte gehou moet word toe Hy vir ons geleer het watter gedagte en gesindheid in ons harte reg van meet af moet wees, wanneer ons met ons Here kommunikeer:

MAT 6:9  “Só moet julle dan bid: Onse Vader wat in die hemele is, laat U Naam geheilig word; “

Groete,

Sakkie

E-pos:            bediening@sakkieparsons.co.za